Sistema de Información Estadística Electoral de Michoacán 2014-2015

Instituto Electoral de Michoacán úpani éski na juramukata jaka (Código Electoral del Estado de Michoacán de Ocampo, arhintskwa 36, arhut’akwa XV y 41, arhut’akwa VII) wékaparini éska yámintuecha mítiaka ampe ka na úkorhexaki erakuntskweri ampe, xanhataxati Sistema de Información Estadística Electoral (SIEE). Jatanharhikurhasti eyankperakwa juramutiecheri erakuntskwa, jima yamintuecha úati mitini namintu úkorheski juramutiecheri erakuntskwa. Sïranteecha ka yámintu karakateecha mítetarakwa jinkoni ka pakatperakwecha éski na juramiti erakuntskweri wantak’a; ísï jimpo yámintu kw’iripuecha arini ampe mítiparini úati niranksï erakwani juramitiichani voto jimpo, ístu marhuakwati partido políticoechani ékaksï wékaaka arini eyakpekuni marhuatani ka mítiparinksï exeni naniasïksï sánteru wétarhinchaxaki ánchekorheni, jorhenkorhetiechani ka jorhentpiriechani marhuakwawati ka jimaksï exent’ani mámaru ampe erakuntskweri karakateechani ka únksï ísï takukukateechani karant’ani ka xarhatap’eni na na úkorhesïni erakuntskweecha.

SIEE patsapatsatasïnti erakuntskweri xanhatakwa 2014 ka 2015 jameri, ka jatanharhikurhasti na na erakunhaski gobernador, diputados locales ka ayuntamientoecha. Ístu jatanharhikurhasti pakarakwa erakuntskwa extraordinaria arhikateecha enka úkorheka Distrito Electoral Local 12 énka úkorheka Ciudad Hidalgo ka Sahuayo, jima énka úkorheka diciembre kwímu jurhiatikwa 2015 jimpo. Eyankpekwa énka xarhanharhitakwarhu jaka sési kantsanturhikata jarhasti ka úakaksï sóntku exentani éka ma jirinantaaka na jásï erakuntskwa jimpo, eka jinteaka estatal, distrital, municipal, seccional ka casilla jimpo. Sési arhunturhikata jatanharhikurhastiksï ari ampe xarhatakweecha orhetaparini namuni votoecha p’itaraski mántani antap’iti, ístu kwirunharhikukata ka p’itakateecha yámintu éska na wékaaka arini eranharhitakwani marhuatani. Sánteru orheta jarhasti antap’itiecha, candidatoecha ka partidoecha, ísï es naksï pakaraka orhepani, tsimanta o tanitarhu naxani voto jimpo ka nani anapuenksï. Ístu jatanharhikurhasti na erakunaskiksï juramutiicha Cheran ka Santa Cruz Tanaco, jima enka pintekwa jimpo marhuatanani jaka juramukwa.

Arini ánchekorheta jimpo énka mítitarpini jaka ka xarhatap’ini jaka yámintu kw’iripuechani, Instituto Electoral Michoacán anapu wékaxati winaperani cultura democrática arhikatani ka eska kw’iripuecha jakakw’aka ka janhanharhiaka arini erakuntskweri k’umanchekwani.